Іван Пятровіч Шамякін – класік нашай нацыянальнай літаратуры. Яшчэ пры жыцці ён стаў адным з самых вядомых і папулярных пісьменнікаў у Беларусі і за яе межамі. Яго творы перакладзены больш чым на 30 моў свету, выдаваліся ў Савецкім Саюзе шматтысячнымі і мільённымі тыражамі. У канцы 1970-х гадоў па чытабельнасці ў СССР сярод пісьменнікаў ён займаў пятае месца.

Вывучэнне творчасці пісьменніка - вельмі важны аспект для выхавання падрастаючага пакалення. Хлопцам і дзяўчатам была прадстаўлена праграма, у якой мелі месца наступныя напрамкі:

• міні-экскурсія па рэдкім фотаздымкам "І. П. Шамякін: вядомы і невядомы";
• літаратурная гадзіна "Чалавек вялікай душы і таленту";
• прагляд фрагментаў з мастацкіх фільмаў, знятых па творах пісьменніка;
• знаёмства з віртуальным музеем І. П. Шамякіна;
• прагляд мастацкай стужкі "Імгненне жыцця" пра жыццёвы і творчы шлях пісьменніка.

З гадамі будзе ўсё відавочней, што творчасць Івана Шамякіна – сапраўдны летапіс жыцця ХХ стагоддзя, пачынаючы ад гадоў рэвалюцыі, грамадзянскай вайны. Але ж гэта і выхад у дзень сённяшні. Застаючыся сам–насам з вечнасцю, ён заўсёды будзе прысутны ў дарагой ягонаму і нашаму сэрцу Беларусі!

З вялікім уражаннем школьнікі пакідалі сцены бібліятэкі! На ўроках беларускай літаратуры яшчэ не раз будзе асэнсоўвацца ўсё тое, што прапанавалі працаўнікі ўстановы для шкаляроў, бо нестандартнасць падыходу - галоўны прынцып для добрага замацавання тэарэтычнага матэрыялу ў свядомасці навучэнца.

Настаўнік беларускай мовы і літаратуры

Таццяна Мікалаеўна Пратасава